RBI New Scheme: వాడని బ్యాంక్ ఖాతాల్లో మీ డబ్బు ఉందా? ఇలా చెక్ చేసుకోండి!

వాడని ఖాతా.. 'బతికిందిలే!' : ఆర్బీఐ (RBI) కొత్త స్కీమ్ పూర్తి వివరాలు

మీ బ్యాంకు పొదుపు ఖాతాలో పదేళ్లుగా లావాదేవీలు ఏమీ జరగలేదా? ఆ ఖాతాను వాడుకలో లేనిదిగా గుర్తించి, అందులోని డబ్బును బ్యాంకులు ఆర్బీఐకి బదిలీ చేశాయా? అయితే మీ డబ్బు పోయిందని చింతించకండి. అలాంటి నిరుపయోగ ఖాతాల కోసం రిజర్వ్ బ్యాంక్ ఆఫ్ ఇండియా (RBI) ఒక కొత్త పథకాన్ని ప్రకటించింది. దీని ద్వారా నిలిచిపోయిన ఖాతాతో పాటు అందులోని డబ్బును కూడా సులభంగా వెనక్కి తెచ్చుకోవచ్చు.

67,000 కోట్ల క్లెయిమ్ చేయని నిధులు

2025 జూన్ నాటికి భారత బ్యాంకింగ్ వ్యవస్థలో సుమారు రూ.67,000 కోట్లకు పైగా క్లెయిమ్ చేయని మొత్తాలు (Unclaimed Deposits) ఉన్నట్లు RBI వెల్లడించింది. సాధారణంగా 10 ఏళ్ల పాటు వాడని ఖాతాల్లోని డబ్బును బ్యాంకులు ఆర్బీఐకి పంపిస్తాయి. ఇప్పుడు ఈ డబ్బును డిపాజిటర్లకు తిరిగి చెల్లించే ప్రక్రియను సులభతరం చేయడానికి, ఈ ఏడాది అక్టోబర్ 1న కొత్త పథకాన్ని ప్రారంభించారు. ఇది 2026 సెప్టెంబర్ 30 వరకు అందుబాటులో ఉంటుంది.

'మీ ధనం.. మీ హక్కు' (My Money My Right)

అవగాహన లేక చాలా మంది బీమా పాలసీలు, డిపాజిట్లు, షేర్లు, డివిడెండ్లను క్లెయిమ్ చేసుకోరు. ఇలాంటి గడువు ముగిసిన ఖాతాల్లోని డబ్బును తిరిగి పొందేలా కేంద్రం 'మీ ధనం మీ హక్కు' అనే కార్యక్రమాన్ని ప్రారంభించింది. కేంద్ర ఆర్థికమంత్రి నిర్మలా సీతారామన్ ప్రారంభించిన ఈ ప్రచారం మూడు నెలల పాటు (అక్టోబర్-డిసెంబర్) కొనసాగుతుంది. ఈ అన్‌క్లెయిమ్డ్ మొత్తాలు ప్రస్తుతం ఆర్బీఐ ఆధ్వర్యంలోని డిపాజిటర్ ఎడ్యుకేషన్ అండ్ అవేర్‌నెస్ (DEA) ఫండ్‌లో ఉన్నాయి.

ఉద్గం (UDGAM) పోర్టల్‌లో వివరాలు

ఖాతాదారులు తమ పాత ఖాతాల వివరాలను సులభంగా తెలుసుకునేందుకు ఆర్బీఐ 'ఉద్గం' (UDGAM) అనే పోర్టల్‌ను తీసుకొచ్చింది.

👉 ఏం చేయాలి?: ఖాతాదారులు https://udgam.rbi.org.in పోర్టల్‌లో తమ పేరు, మొబైల్ నంబరుతో రిజిస్టర్ చేసుకోవాలి.

ఈ పోర్టల్‌లో దాదాపు 30 బ్యాంకుల వివరాలు అందుబాటులో ఉన్నాయి. అయితే, ఈ పోర్టల్ కేవలం సమాచారాన్ని మాత్రమే ఇస్తుంది. డబ్బును వెనక్కి తీసుకోవడానికి లేదా ఖాతాను తిరిగి వాడుకలోకి తెచ్చేందుకు మీరు సంబంధిత బ్యాంకు బ్రాంచికి వెళ్లాల్సి ఉంటుంది.

బ్యాంకులకూ ప్రోత్సాహకాలు

4 నుండి 10 ఏళ్లుగా వాడుకలో లేని ఖాతాలను తిరిగి తెరిపించేందుకు కృషి చేసే బ్యాంకులకు ఆర్బీఐ ప్రోత్సాహకాలు కూడా ప్రకటించింది. బ్యాంకు సిబ్బంది నేరుగా ఖాతాదారుల చిరునామాకు వెళ్లి, వివరాలు సేకరించి ఖాతాలను పునరుద్ధరించడానికి చర్యలు తీసుకుంటారు. తెలుగు రాష్ట్రాల్లో ఇలా నిరుపయోగంగా ఉన్న ఖాతాలు పెద్ద సంఖ్యలో ఉన్నాయి, కాబట్టి ఇది ప్రజలకు ఒక మంచి అవకాశం.

..... జై హింద్.....